Алабугада Япониядән килгән студентлар өчен Сабантуй оештырдылар
КФУда стажировка үтү программасы кысаларында Канадзава шәһәре университетыннан килгән студентлар Алабугада булды.
(Алабуга, 26 август, «Татар-информ», Гөлнара Салихова). Япониядән килгән студентлар өчен милли уеннар белән Сабантуй бәйрәмен “Буревестник” спорт-сәламәтләндерү лагерында уздырдылар. “Кросс-мәдәни алмаш: гуманитар һәм экологик аспектлар” һәм “Заманча фән һәм технология” программасы кысаларында Канадзава шәһәре университеты студентлары КФУда стажировка үтә.
Кичә алар Алабуганың КФУ институтында кунакта булды. Барлыгы 43 студент һәм 2 укытучы. Алар өчен мәдәни программа әзерләнгән. Иртәнге якта кунаклар “Түбән Кама” милли паркында һәм “Алабуга” махсус икътисади зонасында булдылар. Ә көндез вуз студентлары оештырган Сабантуйда катнаштылар. Кунаклар татар халкының гореф-гадәтләре белән танышты.
Бүген япон делегациясе КФУның Алабуга институты музеенда, Алабуга шәһәрчегендә булачак, япон хәрби тоткыннары каберләренә чәчәкләр салачак.