Алабугада Корбан гаете көнне гаилә бәйрәме оештырылачак
Алабуга районының имам-мөхтәсибе Хәлим хәзрәт Шәмсетдинов Алабуга шәһәре һәм районы мәчетләрендә шушы зур бәйрәмгә әзерлек эшләре башланып китүе турында сөйләде. Бу хакта «Алабуга нуры» хәбәр итә.
Җәмигъ мәчетендә, елдагыча, алабугалылар өчен корбан чалу урынын, бөтен шартларга туры китереп, корбанлык сарыкларны әзерлиләр. Корбан чалуга язылу бер ай кала башланып китте, ул 14 июньгә кадәр давам итә. Бүгенгесе көндә чиратка 50ләп кеше язылган. Корбан чалу да нәкъ менә шушы чират буенча алып барыла. Бер сыер — җиде кеше исеменнән чалына.
Корбан гаете хөрмәтенә, «Гуляй-парк» та мөселман алабугалылар өчен гаилә бәйрәме оештырылачак. Ул 18.00 сәгатьтә башлана.
«Барлык алабугалыларны, кечеләрне һәм өлкәннәрне көтеп калабыз! Бәйрәмнәребез мөбәрәк булсын!» — дип өстәде Хәлим хәзрәт.