Алабугада быел термаль комплекс ачарга планлаштыралар
Алабугада быел Нефтьчеләр проспектында термаль комплекс ачарга ниятлиләр. Объектны ачу планнары турында Алабуга районы башлыгы Рөстәм Нуриев йомгаклау матбугат конференциясендә хәбәр иткән. Ул проектның шәһәрдә туризмны үстерү өчен әһәмиятле булуын ассызыклаган.
«Ниһаять термаль комплекс эшли башлар, дип өметләнәм. Моңа өмет бар. Егетләр эшли. Анда барып кайтырга, блогерлар һәм активистлар белән экскурсия уздырырга кирәк», – дип билгеләде Нуриев.
Комплекс ял итү һәм сәламәтләнү өчен күп функцияле киңлек булачак. Кунакларга төрле сезонда коенып була торган урамда һәм эчтә урнашкан коену урыннары, гидромассажлы тозлы коену урыннары, салкын һәм балалар өчен коену урыннары тәкъдим ителәчәк. Мунча зонасында төрле мунчалар һәм сауналар, шулай ук өч төр хаммам эшләячәк. Уртак киңлекләр дә, ир-атлар һәм хатын-кызлар өчен аерым мунча комплекслары да булачак.
Якын арада объектта эчке эшләргә һәм җиһазларны монтажлауга керешергә планлаштыралар. Комплекс якынча 2026 елның икенче кварталы ахыры – өченче кварталы башында ачылырга тиеш.
Эскизлар: Алабуга районы матбугат хезмәте