Алабугада ачылган балалар бакчасында өч тел өйрәтәчәкләр
Яңа бакча 220 урынга исәпләнгән, ул “күптелле белем бирү комплексы”ның бер өлеше булып тора.
(Алабуга, 3 ноябрь, "Татар-информ", "Алабуга нуры" ). Алабуганың“Колосовка” микрорайонында “Йолдызлык” 40нчы балалар бакчасы эшли башлады. Биредә тәрбияләнүчеләргә рус, татар, инглиз телләрен өйрәтәчәкләр. Бу турыда "Алабуга нуры" сайтында хәбәр ителә.
Яңа мәктәпкәчә мәгариф учреждениесе ТР Дәүләт Советы Рәисе урынбасары Татьяна Ларионова һәм райбашкарма комитеты җитәкчесе Рөстәм Нуриев катнашында ачылды. Районның яңа җитәкчесе 40нчы балалар бакчасы мөдире Миләүшә Әдиуллинага мәгариф эшчәнлеген тәэмин итүгә 100 мең сумлык сертификат тапшырды.
Бакчага кадәр яңа асфальт юл төзелешенә иганәчелек иткән Рәшит Хәбировка (“Спецстройсервис” җәмгыяте җитәкчесе) район җитәкчелегеннән Мактау грамотасы бирелде.
Яңа бакча 220 урынга исәпләнгән, ул “күптелле белем бирү комплексы”ның бер өлеше булып тора. Татьяна Ларионова әйтүенчә, берничә тел белү балаларга киләчәктә уңышлы булырга ярдәм итәчәк.
Миләүшә Әдиуллина сөйләвенә караганда, балалар бакчасы җитәкчелеге төшкә кадәр инглиз телендә, төштән соң татар телендә укытырга ниятли. Һәм киресенчә. Тәнәфесләрдә мөгаллимнәр, билгеле, рус телендә дә сөйләшәчәкләр.