Алабуга районында утрауда калган балыкчыларны коткарганнар
Бессониха авылы янында Нократ елгасында балык тоткан кешеләргә ярдәм кирәк булган.
(Казан, 26 ноябрь, «Татар-информ»). Алабуга районында коткаручылар балыкчылар машинасын су аша утраудан алып чыгарга булышкан. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
Бүген министрлыкка Бессониха авылы янында Нократ елгасында Менделеевскиның ике кешесенә ярдәм кирәк, дигән хәбәр килгән.
Кичә ир-атлар «Нива» машинасында балык тотарга килгән, кечкенә утрауда төн үткәргәннәр. Ә иртән Түбән Кама ГЭСына су җибәрү сәбәпле, елганың биеклеге күтәрелеп һәм тирә-юньне су баскан.
Түбән Яке авылы коткаручылары ир-атларга утраудан чыгарга булышкан. Ә күзәтчелек инспекторы су саклау зонасына кергән өчен ир-атларны штрафка тарткан.
