Дин 24 гыйнвар 2024 11:22

«Ал таң» мәчетенең кышкы уеннары абсолют җиңүчесенә тәкә тапшырылачак

Скопировать ссылку

Казан шәһәренең Вахитов һәм Идел буе районнары мөхтәсибәте «Саф һава – тәнгә дәва!» дип исемләнгән кышкы ял итү уеннары оештыра. Әлеге чара нәзарәт тарафыннан игълан ителгән «Гаилә һәм хәләл яшәү рәвеше елы» кысаларында мөхтәсибәт тарафыннан оештырыла. Үткәрү урыны – узган елны үз ишекләрен ачып җибәргән Габдерәхим Утыз Имәни исемендәге «Ал таң» мәчете, дип хәбәр итә ТР Диния нәзарәте матбугат хезмәте.

Биредә әзерләнгән мәйданчыкларда иртәдән алып өйлә намазына кадәр гаилә белән килеп (кече яшьтәге балалардан алып өлкән яшьтәгеләргә кадәр) һәркем спорт төрләрендә шөгыльләнә, саф һавада актив уеннарда катнаша, вакытын файдалы һәм күңелле итеп уздыру мөмкинлегенә ия булачак. Мәчет янәшәсендә ир-атлар, хатын-кызлар, балалар зоналары, чаңгы юллары, туклану урыннары һ.б. әзерләнде.

Спорт шәһәрчеге, ир-атлар, хатын-кызлар һәм балалар өчен эстафеталар үз эшен иртәнге тугызда башлап җибәрәчәк. Дәрәҗәле кунаклар катнашында гаилә бәйрәменең рәсми ачылышы көндезге унга билгеләнгән. Кульминацион мизгел – чаңгы ярышы. Ул 10-14 яшьлек балалар, ир-атлар һәм хатын-кызлар арасында үткәреләчәк. Мәктәп яшендәге кызлар өчен квест, Казанның иң яхшы хәләл кафеларыннан камыр ашлары, кайнар чәй, кофе, снегоходларда йөрү кебек күңел ачу чаралары көтелә. Спорт көненең абсолют җиңүчесенә тәкә тапшырылачак.

Кышкы ял уеннарына теләгән һәркем – казанлылар һәм Татарстан башкаласы кунаклары чакырыла.

Габдерәхим Утыз Имәни исемендәге «Ал таң» мәчетенең адресы: Имәнлек ур., 2в (»Дубравная» метро станциясе).

Сәхифәләр

«Ал таң» мәчетенең кышкы уеннары абсолют җиңүчесенә тәкә тапшырылачак