Актанышта мәдәният хезмәткәрләре бүләкләнде
Мәдәният тармагында озак еллар куйган тырыш һәм нәтиҗәле хезмәтләре өчен Актаныш үзәкләштерелгән китапханәнең методик үзәк җитәкчесе Тәэминә Шадрина, Уразай авыл мәдәният йорты директоры Римма Шәрипова ТР Мәдәният министрлыгының «Мәдәнияттәге казанышлары өчен» күкрәк билгесе белән бүләкләнде. Бу турыда «Актаныш таңнары» хәбәр итә.
Куян авыл клубы мөдире Роза Хәбетдиновага, Актаныш балалар сәнгать мәктәбе укытучысы Ләйлә Галимовага, Чөгәнә авыл клубы мөдире Алсу Арслановага, Киров авылы китапханәчесе Энҗе Сибгатуллинага, Актаныш мәдәният йорты тавыш режиссеры Рөстәм Гарифҗановка, район мәдәният йорты «Ак фильм» киностудиясе җитәкчесе Алмазия Хаҗиевага, Иске Кормаш авылы мәдәният йортының сәнгать җитәкчесе Рәмзил Шәяхмәтовка ТР Мәдәният министрлыгының Мактау кәгазе тапшырылды.