Актанышта Илфат Әнвәров исемендәге турнирда 4нче урын алган көрәшчеләр дә бүләкләнәчәк
РСФСРның спорт остасы, ТАССР чемпионы, Муса Җәлил турниры җиңүчесе Илфат Әнвәровның гаиләсе - Илфир, Тәүфикъ, Айгөл, Айнур, Шәфкать Әнвәровлар әтиләре истәлегенә унынчы ел рәттән көрәш турниры уздыра. Башка көрәш ярышларыннан аермалы буларак, туганнар дүртенче урынга калган көрәшчеләрне дә бүләкләячәк. Бу хакта «Актаныш» сайтында Ләйсән Газизова хәбәр итә.
Илфат Әнвәров истәлегенә оештырылучы көрәш ярышында җиңүчеләрне медальләр, кубоклар, акчалата призлар көтә.
Башка турнирлардан аермалы буларак, Әнвәровлар призлы урынга керә алмыйча, дүртенче урынга калган көрәшчеләргә дә бүләкләр әзерләгән. «Балаларның күңеле төшмәсен, җиңелдем, дип, туктап калмасын, көрәштән күңеле бизмәсен, киресенчә тагы да ныгытыбрак көрәш белән шөгыльләнсен өчен шулай бүләкләргә уйладык», - ди Тәүфикъ Әнвәров.
«Илфат Әнвәров исемендәге ярыш, беренчедән, әтиебезнең исемен мәңгеләштерә, икенчедән, татар милли көрәшен тагы да популярлаштыра, яшүсмерләрне спортка тарта. Көрәштә малай кеше имгәнә, диләр, урамда, теләсә-кайда тәртипсезләнеп йөргәнче балалар, яшүсмерләр көрәш түгәрәкләренә килсеннәр, көч җыйсыннар, җиңүгә омтылсыннар», – диде ул.