Актанышта йөк машинасы белән бәрелешкән «Лада» йөртүчесе үлгән
Һәлакәт Мәскәү-Уфа юлының 1153 нче чакрымында булган.
Скопировать ссылку
(Казан, 2 сентябрь, «Татар-информ»). Татарстанның Актаныш районында «Мерседес» йөк машинасы белән бәрелешү аркасында, «Лада» йөртүчесенең гомере өзелгән. Бу хакта Татарстан буенча Эчке эшләр министрлыгы матбугат хезмәте хәбәр итә.
Бүген иртән Мәскәү-Уфа юлының 1153 нче чакрымында «Лада» йөртүчесе чатта юл бирмәгән һәм фура белән бәрелешкән. Бәрелешү аркасында йөк автомобиле ауган, ә җиңел машина юл кырыена чыккан.
Һәлакәт аркасында «Лада» йөртүчесе алган тән җәрәхәтләреннән урында ук үлгән.
Җиңел машина йөртүчесе һәлакәт вакытында куркынычсызлык каешын эләктермәгән булуын да искәртү мөһим.