Җәмгыять 31 декабрь 2017 05:00

Актанышта Кыш бабайлар парады үтте

Җәяүлеләр Кыш бабайларны якынга ук килеп тамаша кылды.

Скопировать ссылку

(Актаныш, 31 декабрь, "Татар-информ", "Актаныш таңнары"). Актанышта Кыш бабайлар парады үтте, дип яза җирле басма.

Бер бәйрәмдә бер Кыш бабай гына күреп ияләшкән актанышлылар, мөгаен, бүген үзләрен Кыш бабайлар илендә кебек хис иткәннәрдер. Иртәнге сәгатьләрдән үк район үзәгенең төрле почмакларында Кыш бабайлар күренә башлаган иде. Көндезгә алар барысы бергә Ленин паркында очрашты. Бү мизгелләр, чыннан да, әкияти иде: 60ка якын Кыш бабай, Кар кызы, алрның юлдашлары янә бер тапкыр бусагада Яңа ел икәнен искәртте.

Өстән тамып торган тамчы да, сөттәй ак томан да Актаныштагы Кыш бабайлар парадына комаучау итә алмады. Яңа ел символлары парк аша үтеп, Актаныш урамнары буйлап Үзәк чыршы урнашкан мәйданга юнәлделәр. Алар урамдагы һәркемне бәйрәм белән тәбрик итеп, изге теләкләрен ирештерде.

Җәяүлеләр Кыш бабайларны якынга ук килеп тамаша кылды, алар белән фотосурәткә төшәргә ашыкты. Машиналар исә елга бер генә урам ямьли торган могҗизаи затларны туктап уздырдылар.

Үзәк мәйданда Кыш бабайларны халык белән бергә ярышлар да көтә иде. Район үзәгендәге 14 оешма, шул исәптән балалар бакчалары, мәктәп коллективларының Кыш бабайлары таудан чанага утырып та шуып төштеләр, лабиринттан да үттеләр, чаңгы да шудылар, көзгедәй ялтырап торган бозлы тауга йөгереп тә менделәр. Шул рәвешле бик кызыклы һәм күңелле тамашага әйләнде парад.

#Актаныш таңнары

Сәхифәләр

Актанышта Кыш бабайлар парады үтте