Актанышта игенче кадрларның гамәли һәм теоретик белемнәрен тикшерделәр

(Актаныш, 19 июль, "Татар-информ", "Актаныш - информ", Лилия Бәхтиева). Җәйге ял чоры булуга карамастан, 18 июль көнне Актаныш технология техникумына районны икмәк белән тәэмин итүче кадрлар җыйналды. Алар арасында хуҗалык җитәкчеләре, комбайнчылар, баш инженерлар, баш агрономнар, икътисадчылар да бар иде.
Алар белән район башкарма комитеты җитәкчесе Энгель Фәттахов, район авыл хуҗалыгы һәм азык-төлек идарәсенең баш белгечләре очрашты, дип яза җирле басма.

Очрашуның максаты: урып-җыю кампаниясе башланганчы әлеге хезмәт ияләренең гамәли һәм теоретик белемнәрен тагын бер тапкыр тикшерү һәм, иң мөһиме, шул белем һәм күнекмәләрен тагын да арттыру. Аннан килеп, бу тармакка әледән-әле яшь кадрларның өстәлеп торуын да исәпкә алсак, укулар беркемгә дә зыянга түгел.

Укулар ике көн дәвам итәчәк, шушы вакыт эчендә авыл хуҗалыгының игенчелек тармагында хезмәт куючы 182 актанышлы белем алачак. Аларның алган белемнәренә исә гамәли өлештә белгечләр бәя бирәчәк.

Урып-җыю чорында таңны комбайн штурвалы артында каршылаган игенчеләрнең, бер карасың, тормыш тәҗрибәсе белән беррәттән эш тәҗрибәсе дә шактый тупланган. Әмма аңа да карамастан, әлеге укуларның әһәмияте бик зур. Басу-кырларда үскән игенне җыеп алу күп очракта югалтулар бәрабәренә башкарылуы беркемгә дә сер түгел. Югалтуларның нигезендә исә, әлеге дә баягы, эш тәртибенә тулысынча төшенеп бетмәү ята. Нәтиҗәдә, вакытында чәчеп, тәрбияләп торган алтынга тиң икмәкне без нәкъ менә урып-җыю барышында югалтабыз. Иң аянычы, гади генә хаталар аркасында килеп чыга бу хәл.

Игенчеләр басу-кырларга ныклы әзерлек, практик һәм гамәли күнекмәләр белән "коралланып" керәләр икән - быел Актаныш районында хаталарга юл куелырга тиеш түгел кебек.

Аннан быел игенчеләргә ел саен комбайн караудан соң билгеләнә торган кызыксындыру премиясе дә ике тапкырга арттырылган булып чыкты. Шул рәвешле район җитәкчелеге игенчелек тармагында хезмәт куючыларның эш күрсәткечләрен дә яхшыртырга тели. 

Сүз уңаеннан, быел Актаныш районының иген басуларын 110 кыр корабы иңләячәк. Район җитәкчелеге аларның эш шартларын яхшырту, хезмәт күрсәткечләрен арттыру юнәлешендә шактый саллы эш башкара. Амбарларда – мул уңыш, кесәдә хәләл хезмәттән кергән акча булсын өчен бу да мөһим факторларның берсе. Калганы инде игенченең үзеннән һәм, беренче чиратта, һава шартларыннан торачак. Быел да сынатмаска иде! - диелгән район хәбәрендә.