Мәдәният 27 июль 2018 06:00

Актанышта гармунга куелган һәйкәлне автор 15 көндә тимердән чүкеп ясаган

Ул киләчәктә тимердән Коръән китабының тышлыгын ясарга ниятли.

Скопировать ссылку

(Актаныш, 27 июль, "Татар-информ", "Актаныш - информ", Лилия Бәхтиева). Татар халкының тарихында беренче тапкыр гармунга куелган һәйкәл-стеланың авторы – Актаныш районы, Яңа Әлем авылы егете Азат Сәрвәров. 27-28 июнь көннәрендә Актанышта үтәчәк "Актаныш гармуннары" Бөтенрәсәй татар гармунчылары фестиваленең төп символына әвереләчәк әлеге экспонатны актанышлы 15-16 көн эчендә тимердән чүкеп ясаган, дип яза җирле басма.

Хәер, Азат Сәрвәровның тимердән чүкеп эшләнгән экспонатлар багажы шактый. Алар арасында урам капкалары, ат чаналары, самавырлар, сандыклар, өстәл-урындыклар, мангаллар, йорт декорлары бар.

Тимер кадәр тимерне буйсындыра алган асыл ирнең яшәгән йорты да урамны ямьләп тора: чүкеп, коеп эшләнгән капкалары гына да ни тора аның?!

Азат үзе эретеп-ябыштыручы һөнәрен үзләштергән, бүген Актанышның бер оешмасында хезмәт куя. Эштән буш вакытларда күңеленә якын булган тимерчелек белән шөгыльләнә. Тимер остасы үзе әлеге өнәрен бабасыннан килгән сәләт дип әйтә. Заманында аның бабасы Сәрвәр даны еракларга таралган оста тимерче булган. Аның тимердән скрипка ясавы турында бүген дә халык сөйли.

10 еллап дин юлыннан баручы Азат Сәрвәровның күңелендә йөрткән хыялы да бар. Ул киләчәктә тимердән Коръән китабының тышлыгын ясарга ниятли, диелгән район хәбәрендә.

#Актаныш таңнары

Сәхифәләр

Актанышта гармунга куелган һәйкәлне автор 15 көндә тимердән чүкеп ясаган