Актаныш районы төрле өлкә күрсәткечләре буенча май аена нәтиҗә ясады
Пар күгәрчен сыны Мәсәде авыл җирлегенә тапшырылды.
(Актаныш, 28 июнь, "Татар-информ", "Актаныш таңнары", Лилия Бәхтиева). Актанышта ай саен табибларның, җирлек башлыкларының, мәктәп директорларының, полиция, социаль яклау бүлеге вәкилләренең бергә җыелып, җирлекләрдәге демографик вәзгыятькә, авыр, эчүче гаиләләр юнәлешендәге эшчәнлеккә күзәтү ясау, югалту-табышларын барладылар. Бу турыда җирле басма сайтында хәбәр ителә.
Киңәшмә май ае нәтиҗәләренә багышланган иде. Гадәттәгечә, көн кадагына чыгарылган мәсьәләләр буенча җаваплы затлар хисап тотып, алга куелган максат-бурычлар билгеләнде.
Бу юлы да җирлек башлыкларының эшчәнлеге берничә күрсәткеч буенча бәяләнеп, югары күрсәткечкә ирешкән җирлек пар күгәрченгә лаек булды. Үлем структурасы, эш яшендәгеләрнең вафаты, социаль яктан куркыныч, авыр гаиләләр саны, гаиләләрдә теркәлгән җәнҗаллар, җирлектә туган балалар саны исәпкә алынганнан соң, пар күгәрчен сыны Мәсәде авыл җирлегенә тапшырылды.