Актаныш районы хезмәт коллективлары агач утырту өмәләрендә катнашты
Актаныш муниципаль районы башлыгы Энгель Фәттахов та өмәдә катнашты.
(Актаныш, 27 апрель, "Татар-информ", "Актаныш-информ", Ләйсән Газизова). 27 апрель - бердәм агач утырту көнендә Актаныш районы хезмәт коллективлары, җирлектә яшәүчеләр агач утырту өмәләрендә катнашты. Бу турыда җирле басма хәбәр итә.
Актаныш авылының Советлар Союзы Герое Баян Дәүләтов исемен йөртүче урамда “Бердәм Россия” партиясенең Актаныш районы бүлекчәсе активы да чыршы агачлары утыртты.
“Бердәм Россия”сәяси партиясенең Актаныш җирле бүлекчәсе сәркатибе, Актаныш муниципаль районы башлыгы Энгель Фәттахов та өмәдә катнашты.
“Язын һәм көзен агач утыртып район үзәген дә, авылларыбызны да яшелләндереп торырга тиешбез. Һәр авылны, һәр шәһәрне агачлар бизәп тора, тирә-юньне кислород белән баета. Актаныш бик матур, яшеллеккә күмелеп утыра. Безгә кадәр район белән идарә иткән җитәкчеләрнең яхшылап уйлап, планлаштырып агачлар утыртуның нәтиҗәсе бу.
Без әлеге традицияне дәвам итеп, тулыландырып торырга тиеш. Чөнки Актаныш үсә, урамнар, йортлар арта. Җирлектә яшәүче һәркем үз урамына агач утырта икән, димәк Актанышны яшелләндерүгә үзеннән өлеш кертә”, - диде район башлыгы.