Җәмгыять 30 декабрь 2018 19:00

Актаныш халкы бүген Яңа елны бергәләп каршы алды

Мәйданга җыелган җирле халыкны, район кунакларын Энгель Фәттахов якынлашып килүче бәйрәм белән тәбрик итте.

Скопировать ссылку

(Актаныш, 30 декабрь, "Татар-информ", "Актаныш таңнары", Лилия Бәхтиева). Бүген Актаныш районы халкы бергәләшеп Яңа елны каршы алды. Иртәнге сәгатьләрдән үк район үзәгендә башланып киткән ярминкә һәркемгә бәйрәм рухы, бәйрәм кәефе өстәде. Бу турыда район газетасы хәбәр итә.

Авыл хуҗалыклары, шәхси эшмәкәрләр актанышлыларга ит, май, мал кебек продукция тәкъдим итсә, авыл җирлекләре, район үзәгендәге белем бирү учреждениеләре, оешмалары бәйрәм ярминкәсен җыр-биюле тамашага әверелдерде. Район башлыгы җитәкчелегендәге махсус комиссия һәр ноктада булып, арадан иң-иңнәрне билгеләде.

Быел Актанышта Яңа ел алды чаралары шактый үзгә форматта үтте. Район хакимияте бинасы каршындагы мәйданда шат авазлар, җыр-моң тынып тормады. Бәйрәм мизгелләре Кыш бабайлар парады, атлар парады белән бизәлде. Йөзәрләгән Кыш бабайлар һәм Кар кызлары зур әйләнәдә биеде, халыкның кәефен күтәрде.

Мәйданга җыелган җирле халыкны, район кунакларын Энгель Фәттахов якынлашып килүче бәйрәм белән тәбрик итте. Һәркемгә сәламәтлек, имин еллар, уңышлар теләде.

#Актаныш таңнары

Сәхифәләр

Актаныш халкы бүген Яңа елны бергәләп каршы алды