Актаныш Сабан туенда махсус операция катнашучысының гаиләсенә Батырлык ордены тапшырылды
Актаныш районында Сабан туе бәйрәмендә махсус хәрби операция катнашучысы Айназ Бакировны искә алу тантанасы булды. Чара барышында егетнең гаиләсенә хәрбигә үлгәннән соң бирелгән дәүләт бүләге — Батырлык ордены тапшырылды.
Россия Федерациясе Президенты указы нигезендә, кече лейтенант Айназ Бакиров махсус хәрби операция зонасында хәрби бурычын үтәгәндә күрсәткән батырлыгы һәм фидакарьлеге өчен югары бүләккә лаек булды.
Геройның гаиләсенә — хатыны Нурия Фанил кызына, улы Нариманга һәм кызы Азизага бүләкне Актаныш районы башлыгы Ленар Зарипов һәм Татарстан Республикасы Дәүләт Советы депутаты Альберт Хәбибуллин тапшырды.
Тантанада катнашучылар хәрбинең батырлыгы әһәмиятен ассызыклады һәм аның якыннарына ярдәм сүзләрен җиткерде. Ватанны саклаучы турында истәлек алга таба да сакланачак, дип билгеләп үтелде.
Материал Ләйсән Газизова катнашында әзерләнде
Фотоларны Ләйсән Газизова тәкъдим итте