Актаныш районы Киров авылы хатын-кызлары хәрбиләргә җибәрү өчен токмач кисә
Актаныш районы Киров авылы халкы, гадәттәгечә, махсус хәрби операциядәге якташларына ярдәм кылуны дәвам итә. Авыл мәдәният йортында токмач кисү һәм маскировка челтәрләре үрәләр.Бүген егермедән артык хатын-кыз авыл мәдәният йортына токмач кисү өмәсенә килде. Алар 100 йомыркага өй токмачы басып кисте. Бу хакта «Актаныш» сайтында Ләйсән Газизова яза.
Бер-берсенең күңелен күтәреп камыр басканда җырлап та алалар. Лаеклы ялдагы Резеда Маннанова авылдашларының эшләгәнен видеога төшергән, апаларга мактау сүзләрен әйтә, «Молодцы, сез барыгыз да эшчәннәр!», - ди.
Тиздән Актаныштан чираттагы гуманитар ярдәм хәрбиләргә озатылачак. Кировлылар әзерләгән йорт токмачлары да шушы ярдәм белән солдатларга күчтәнәч булып барып җитәчәк.
Алдагы гуманитар йөк белән игелекле, уңган хатын-кызлар 6 тартма токмач кисеп озаткан иде инде. Бусында да шуннан ким итмичә җибәрергә ниятлиләр. Токмач басарга онын, йомыркасын үзләре алып килә, өмәдә катнаша алмаган авылдашлар продукция китерәләр, я булмаса, акчалата ярдәм итәләр.