Архив 16 июль 2023 20:45

Актаныш игенчеләре уракка төште

Скопировать ссылку

«Актаныш» агрофирмасы игенчеләре районда беренче булып урып-җыюга кереште. Бу хакта «Актаныш-информ» сайты яза.

Үткән шимбәдә алар арпаны контроль суктырып караса, якшәмбе көнне инде тулысынча урып-җыю эшләрен башлап җибәрделәр.

«Быел, соңгы елларны исәпләсәк, иң авыр елларның берсе. Чөнки яздан алып, бүгенге көнгә кадәр басуларга яңгыр тамчысы да төшмәде диярлек», – диде агрофирманың баш агрономы Газинур Әхмәев.

Алар илле гектар мәйдандагы арпаны суктырып, ындыр табагына урнаштырып куйганнар. Дымлылыгы 12-13 процент булды, ди тәҗрибәле агроном.

Агрофирманың алты комбайны урып-җыйнауда катнашачак. Бу участокларга Акрос комбайннарын кертмәгәннәр.

«Саламын җыйнап аласы булгач, шуңа Акросларны басуга чыгармый тордык. Алар барысы да төзек, комбайнчылар белән комплектлаштырылган. Калган басуларга алар да чыгачак. Сугучы комбайнда эшләүчеләр Эльбрус Мөхәммәтов, Фоат Дәүләтов, Нияз Ганиев, Альберт Шәңгәрәев, егучы комбайнда эшләүчеләр Илшат Гыйзетдинов һәм Ришат Рамзановлар — барысы да тырыш һәм тәҗрибәлеләр. Икмәк ташырга да машиналар һәм шоферлар җитә», – диде Газинур Әхмәев.

Сәхифәләр

Актаныш игенчеләре уракка төште