Аксубай районы фермерлары конференциясендә киләчәккә бурычлар куелды
Конференция барышында Татарстан фермерлары съездына делегатлар тәкъдим ителде һәм сайланды.
(Аксубай, 20 гыйнвар, "Татар-информ", "Авыл таңнары", Зинаида Леонтьева). Аксубай районы Яңа Ибрай авылы мәдәният йортында фермерлар конференциясендә 2018 елга нәтиҗә ясадылар һәм киләчәккә планнар билгеләделәр. Бу турыда район басмасы яза.
Аның эшендә фермерлар, авыл җирлекләре башлыклары, авыл хуҗалыгы һәм азык-төлек идарәсе белгечләре, районның башка хезмәт вәкилләре катнашты.
Конференциядә катнашучылар иң элек уңышлы эшләп килүче фермерлар тәҗрибәсе белән танышты. Чара исә Иске Ибрай авылындагы Марат Сафин КФХ базасында башланып китте. Әлеге КФХ – районда тотрыклы үсеп килүче хуҗалыкларның берсе.
Конференциядә катнашучыларга әлеге фермерны тәкъдим итеп, район башлыгы Камил Гыйльманов эшмәкәрләргә хас характер сыйфатларын билгеләде: максатка ирешүдә үҗәтлек, хезмәт сөючәнлек һәм зирәк фикер йөртә белү. Чарага җыелучыларны сәламләгәннән соң, хуҗа кеше кунакларны үзенең хуҗалыгы белән таныштырды.
Конференция барышында шәхси затлар тарафыннан сөт тапшыру мәсьәләләре дә каралды. Район башлыгы урынбасары Илшат Заһидуллин, сөт кабул итү шартларына тукталып, сөт җыючыларның соңгы җыелышында чыгарылган карар нигезендә районда сөт бәясе литры 23 сумнан да түбән булмаска тиеш икәнлеген искәртте.
Конференция барышында Татарстан фермерлары съездына делегатлар тәкъдим ителде һәм сайланды.