Аксубай районында хәрби хәрәкәтләр ветераннары иптәшләрен искә алды
Аксубай районы Савгач авылында Сугышчан хәрәкәтләр ветераннары көненә багышланган тантаналы чара узды. Бу хакта «Авыл таңнары» сайтында хәбәр ителә.
Кайнар нокталарда хәрби бурычларын үтәгән ветераннар җәмгыяте «Ватанга хезмәт итәм» иҗтимагый хәрәкәтендә кыю һәм патриот кешеләрне берләштерә. Алар кулларына корал тотып, дәүләт мәнфәгатьләрен аның чикләрендә яклаганнар, тормышларын куркыныч астына куйганнар.
Савгач авылында сугышчан дан мемориалында кайнар нокталарда хезмәт иткән элеккеге солдатлар, шулай ук башка төр гаскәрләр ветераннары, Аксубай кунаклары җыелды. Савгач мәктәбенең яшь армиячеләре мактаулы сакта торды.
Тантаналы чарада ветераннар сугышчан иптәшләрен искә алдылар, Ватанга мәхәббәт, Ватанга карата изге бурыч, яшь буынны патриотизм рухында, якташ сугышчыларның батырлыгы үрнәгендә тәрбияләргә кирәклеге турында сөйләделәр.
Митингта катнашучылар обелискка чәчәкләр салды. Хәрби хезмәт ветераннары ерактагы сугышлардан әйләнеп кайтмаганнарны бер минутлык тынлык белән искә алдылар.
Аксубайдан сугыш хәрәкәтләре ветераны көнен бәйрәм итүгә килгән «Ватанга хезмәт итәм» ветераннар иҗтимагый оешмасы активистлары Савгачтагы ветераннар штабында булды, аның эшчәнлеге белән танышты, музей бүлеге экспонатларын карады. Кунаклар сугышчы ветераннарның җирле активы эшенә югары бәя бирде.