Аксубай мөхтәсибәтендә аксакаллар шурасының яңа рәисен сайладылар
Аксубай мөхтәсибәтендә аксакаллар шурасының яңа рәисен сайладылар. Вазифаны Вил Галиуллин җитәкләде. Аңа 64 яшь, ул Мюд мәчете хәзрәте. Бу хакта «Авыл таңнары» хәбәр итә.
Яңадан сайлау район Башкарма комитеты җитәкчесе Алмаз Мингулов һәм ТР мөселманнары Диния нәзарәтенең Аксакаллар шурасы рәисе Айрат хәзрәт Әюпов катнашында узды. Район аксакаллар шурасы эшен 10 елдан артык Минзаһит Ганиев алып барды.
Район имам мөхтәсибе Равил хәзрәт Камалетдинов билгеләп үткәнчә, Минзаһит Вәлимхамәт улы үз вазифаларына бик җаваплы караган, ул мөхтәсибәт эшләрен алып баруда имам мөхтәсибләргә таяныч булган. Ләкин вәкаләтләрен үз теләге белән тапшырган.
– Мин Минзаһит Вәлимхамәт улы белән элек ул авыл хуҗалыгы идарәсе җитәкчесе вазифасында булган вакыттан ук таныш. Мин ул вакытта республика Сельхозтехникасында эшли идем. Дини вазифада да ул бик җентекле һәм җаваплы эш алып барды, – дип билгеләп үтте Айрат хәзрәт. – Постка тәкъдим ителгән кандидатка аксакаллар, имам мөхтәсиб һәм район җитәкчесе белән тыгыз элемтәдә эшләвен дәвам итүен телим.
Алмаз Мингулов җәмгыятьнең рухи һәм мәдәни үсеше, шулай ук башка диннәр кебек үк ислам традицияләрен һәм кыйммәтләрен саклау мәсьәләләренең никадәр мөһим булуын билгеләп үтте. Аксакаллар шурасының яңа рәисе үз планнары белән уртаклашты, район халкы арасында рухи бердәмлек кирәклеген ассызыклады.