АКШның Йель университетында узган татар кичәсендә төрле милләтле 100 кеше катнашкан
Америкалылар, студентлар, башка милләт вәкилләре татар халык ашларын, бигрәк тә бәлеш, кыстыбый, чәкчәкне яратып авыз иткән.
Скопировать ссылку
(Казан, 17 ноябрь, "Татар-информ", Лилия Локманова-Хәсәнова). АКШның Йель университетында татар мәдәнияте, гореф-гадәтләре, йолалары белән йөзләп кеше танышкан. Бу хакта "Татар-информ" мәгълүмат агентлыгына чараны оештыручыларның берсе Ләйсән Туктамышова хәбәр итте.
Чарада Йель университеты профессорлары, аспирантлары, студентлары, Коннектикут һ.б. башка штат татарлары катнашкан.
"Америкалылар, студентлар, башка милләт вәкилләре татар халык ашларын, бигрәк тә бәлеш, кыстыбый, чәкчәкне яратып авыз иттеләр", - диде Ләйсән Туктамышова.
Кичәдә Лилия Бикбова кызлары Кадрия һәм Камилла белән татар җырларын җырлаган. Сүз уңаеннан Кадрия Бикбова "Сәнгать планетасы" фестивалендә беренче урын яулаган. Ул чарада опера арияләре башкарган.
Биш яшьлек Даниил Җиһаншин шигырь сөйләгән. Үзлегеннән татар телен өйрәнгән Андрей Дринфелд та татар җырлары җырлаган..
Чараны Бөтендөнья яшьләр форумы, университетның халыкара клубы оештырган.
Йель университеты - Гарвард һәм Принстон университетлары белән беррәттән АКШның иң зур югары уку йортлары исемлегенә кергән. Ул Американың Коннектикут штатының Нью-Хейвен каласында урнашкан. Биредә 2 меңгә якын курс буенча 65 кафедрада белем алырга мөмкин.
