«Ак Барс» хоккей командасы «Адмирал»ны икенче уенда җиңде
Бүген «Ак Барс» хоккейчылары «Адмирал»ны 2:1 исәбенә отты. Уен Казанның «Татнефть Арена» боз сараенда узды.
«Ак Барс» – «Адмирал» уеннар сериясенең беренче матчында Казан командасы шулай ук бер алка аермасы белән җиңгән иде (3:2). Хәзер «Ак Барс» исәбендә ике җиңү.
- Казанның «Ак Барс» командасы Владивостокның «Адмирал»ы белән плей-оффның икенче этабында дүрт җиңүгә кадәр көрәшә. Моңа хәтле беренче этапта «Ак Барс» Түбән Каманың «Нефтехимик» хоккейчыларын, ә «Адмирал» Уфаның «Салават Юлаев»ын җиңеп алга үткән иде.
Беренче период. Унбишенче минутта исәп ачылды, беренче алка «Ак Барс» капкасына керде, гол «Адмирал» хоккейчысы Антон Берлёв исәбенә язылды (0:1).
Икенче период. Сигезенче минутта «Ак Барс» һөҗүмчесе Илья Сафонов исәпне тигезләштерде (1:1).
Өченче период. Ундүртенче минутта, «Ак Барс» күпчелектә уйнаганда, Вадим Шипачёв «Адмирал» капкасына икенче алканы кертте (2:1).
Командалар составы:
«Ак Барс»
- Билалов (Мифтахов);
- Воронков – Сафонов – Радулов, Юдин – Войнов;
- Кагарлицкий – Шипачёв – Петров, Токранов – Лучевников;
- Галиев – Семёнов – Панюков, Адамчук – Лямкин;
- Лукоянов – Галимов – Дыняк (Терехов) Евсеев.
«Адмирал»
- Серебряков (Хомченко);
- Фәйзуллин – Грачёв – Шевченко, Шулак – Лисовец;
- Емец – Криштоф – Червены, Паутов – Хәмидуллин,;
- Горшков – Берлёв – Чебыкин, Метальников – Орехов;
- Гутик – Шэн – Елисеев (Корбит).
«Адмирал» составында Казанда туып, Казан хоккей мәктәбен үткән Динар Хәмидуллин һәм Данил Фәйзуллин уйный.
«Ак Барс» – «Адмирал» сериясенең өченче уены Владивостокта үтәчәк. Матч 20 март 12:30 сәгатьтә башлана.