«Ак Барс» суднолар төзү корпорациясе елына 8 «Метеор» җитештерергә әзер
«Ак Барс» суднолар төзү корпорациясе елына сигезгә кадәр «Метеор-2020» тиз йөрешле пассажир судносын төзү өчен куәтләргә ия. Бу хакта корпорациянең генераль директоры Ренат Мистахов «Флот-2026» хәрби-диңгез халыкара салоны кысаларында ТАСС агентлыгына хәбәр итте.
Аның сүзләренчә, бүгенге көндә җитештерү күләмнәрен арттыруда төп киртә булып тотрыклы заказлар булмау тора.
«Без алтыны да, сигезне дә төзи алабыз, ләкин тотрыклы заказлар күләме юк», – дип билгеләп үтте Мистахов.
Корпорация башлыгы ассызыклаганча, бу юнәлешне үстерүдә тиз йөрешле флотны яңарту программасы ярдәм итәр иде.
Мистахов шулай ук Идел буйлап төбәкара рейсларда пассажирлар йөртү проектын алга таба үстерүгә өмет белдерде. Идел буйлап су асты канатлы «Елга магистральләре» судноларында төбәкара пассажирлар ташу проекты 2023 елдан гамәлгә ашырыла. 2025 елда суднолар сигез маршрутта 33 меңнән артык пассажирны йөрткән.
«Метеор» тибындагы суднолар елгалар, сусаклагычлар һәм күлләр буйлап пассажирларны тиз арада йөртү өчен каралган. 1961 елдан бирле Яшел Үзән заводы 400дән артык шундый судно төзегән. Аларның бер өлеше Россиядән читтә дә файдаланыла.