«Ак Барс» – «Сибирь» хоккей матчында 9 гол керде, тик Казан командасы оттырды
Бүген Казанның «Ак Барс» хоккейчылары Новосибирск шәһәренең «Сибирь» командасына җиңелде. Уен «Татнефть Арена» боз сараенда узды.
Беренче периодның беренче секундларында ук «Ак Барс» һөҗүмчесе Александр Барабанов исәпне ачты (1:0). Өченче минутта ул икенче алкасын кертте (2:0). Унбишенче минутта, «Ак Барс» азчылыкта уйнаганда, «Сибирь» уенчысы Владимир Бутузов гол кертте (2:1).
Унҗиденче минутта Георгий Белоусов исәпне тигезләде (2:2). Илле секунд үтүгә, Валентин Пьянов Новосибирск командасын алга чыгарды (2:3). Бу голдан соң «Ак Барс» капкачысын алмаштырды: Тимур Билалов урынына бозга Әмир Мифтахов чыкты. Периодның соңгы минутында Әмир Мифтахов та алканы тотып кала алмады, Алексей Яковлев гол кертте (2:4).
Икенче периодның уникенче минутында, «Ак Барс»ның азчылыгы вакытында, «Сибирь» сакчысы Егор Мартынов гол кертте (2:5).
Өченче периодның унтугызынчы минутында «Ак Барс» капкачысын алтынчы мәйдан уенчысына алмаштырды, шуннан файдаланып, «Сибирь» алканы буш капкага кертеп куйды, гол авторы – Никита Коротков (2:6). Соңгы минутта Семён Кошелев Казан командасының артка калышуын киметә алды (3:6).
Командалар составы:
«Ак Барс»
- Билалов (Мифтахов);
- Барабанов – Петан – Яшкин, Юдин – Миллер;
- Коршков – Сафонов – Галимов, Лямкин – Марченко;
- Терехов – Семенов – Кошелев, Лучевников – Яруллин;
- Дыняк – Кателевский – Бабенко (Җамалтдинов), Евсеев.
«Сибирь»
- Костин (Красоткин);
- Коротков – Бек – Широков, Мёрфи – Гордеев;
- Белоусов – Андреофф – Карпов, Мартынов – Аланов;
- Бутузов – Пьянов – Кара, Ахияров – Морозов;
- Яковлев – Климович – Сушко (Климович), Лукин.
«Ак Барс»ның киләсе уены Мәскәүдә узачак. «Спартак» командасына каршы матч 12 октябрьдә 14:00 сәгатьтә башлана.