news_header_top
Руc Тат
16+
news_header_bot
news_top
Спорт 24 октябрь 2014 12:32

“Ак Барс” “Северсталь”ны җиңеп, Көнчыгыш конференциясендә лидерлыкка чыкты

Казанлыларга җиңүне янә Янне Песонен алкасы китерде

Скопировать ссылку

(Казан, 24 октябрь, “Татар-информ”). Казанның “Ак Барс” командасы Континенталь хоккей лигасының Көнчыгыш конференциясендә лидерлыкка чыкты.

Кичә Зиннәтулла Биләлетдинов канаты астында уйнаучылар Череповецта “Северсталь” командасын 2:1 исәбе белән отуын бәйрәм итте. Әмма Көнчыгыш лидерлыгына чыгуда “барс”ларга “сталевар”ларны җиңү генә түгел, “Торпедо”ның “Магнитка”ны җиңүе дә мөмкинлек бирде.

Ике период дәвамында командалар җанатарларны капкага кертелгән алкалар белән сөендерә алмады. Матч язмышы өченче периодта хәл ителде. Башта Артем Лукоянов счетны ачып җибәрде. Ун минут узуга, боз хуҗалары исәпне тигезләде – Николай Стасенко егылган хәлдә сакчы һәм капкачыдан остарак булып чыкты. Эш овертаймга якынлаша иде, тик Янне Песоненның югары почмакка атуы, хәлне башка якка борып куйды. Нәтиҗәдә, финн, ике көн элек ЦСКА командасына каршы уйнагандагы кебек үк, ”Ак Барс”ка җиңү китерде. Песонен сезонда җиденче голын кертеп, казанлыларның иң яхшы снайперы булды.

Шулай итеп, казанлыларның читтәге турнесы тәмамланды. Чираттагы матч Казанда Гагарин Кубогының хәзерге хуҗасы – Магнитогорскиның “Металлург”ына каршы узачак. Уен 27 нче октябрьдә үткәрелә.

 

news_right_1
news_right_2
news_bot