«Ак Барс» оттырды, «Динамо» җиңүенә китергән голны «Ак Барс»ның элекке уенчысы кертте
Бүген Казанның «Ак Барс» хоккейчылары Минск шәһәренең «Динамо» командасына җиңелде. Уен Минск шәһәрендә узды.
Беренче периодның унтугызынчы минутында, «Ак Барс» күпчелектә уйнаганда, Александр Хмелевский исәпне ачты (0:1).
Икенче периодның бишенче минутында «Динамо Минск» һөҗүмчесе Станислав Галиев исәпне тигезләде (1:1). Станислав Галиев «Ак Барс» өчен чит уенчы түгел, ул Казанда 6 сезон уйнаган иде. Уникенче минутта «Ак Барс» уенчысы Артём Галимов гол кертте (1:2).
Өченче периодның алтынчы минутында алка «Ак Барс» капкасына керде, тик, гол керер алдыннан, хоккейчы кул белән пас бирүе ачыкланды, хөкемдарлар аны исәпкә алмады. Уникенче минутта Тай Смит исәпне тигезләде (2:2). Бер минуттан «Ак Барс» яңадан алга чыкты, голны Михаил Фисенко кертте (2:3). Уналтынчы минутта Сергей Кузнецов алканы «Ак Барс» капкасына кертте (3:3). Унҗиденче минутта Вадим Шипачёв гол кертте, «Динамо» командасы алга чыкты (4:3). Вадим Шипачёв та 2022-2024 елларда Казан командасы өчен уйнаган иде.
Командалар составы:
«Динамо Минск»
- Демченко (Фукале);
- Лимож – Пинчук – Энэс, Лайл – Мелош;
- Бориков – Шипачёв – Липский, Смит – Брук;
- Сотишвили – Стась – Кузнецов, Хэмилтон – Диц;
- Мороз – Усов – Галиев (Белкин), Хенкель.
«Ак Барс»
- Билалов (Бердин);
- Яшкин – Семёнов – Алистров, Лямкин – Миллер;
- Денисенко – Хмелевский – Барабанов, Карпухин – Марченко;
- Пустозёров – Сафонов – Галимов, Лучевников – Фальковский;
- Дыняк – Фисенко – Сем. Терехов (Җамалтдинов).
8 ноябрьдә «Ак Барс» Ярославль шәһәренең «Локомотив» командасына каршы уйнаячак. Матч 17:00 башлана.