«Ак Барс»ның элекке уенчысы Казан командасының җиңелүенә сәбәпче булды
«Ак Барс» икенче тапкыр «Металлург»ка оттырды.
(Казан, 14 октябрь, «Татар-информ», Гөлия Хәсбиуллина). Бүген Казанның «Ак Барс» хоккейчылары Магнитогорск шәһәренең «Металлург» командасына җиңелде.
Уен Магнитогорскида узды. «Ак Барс» читтә уйнаган өч уенның икесендә җиңде. Казахстанның «Барыс» командасын 6:3 һәм уфаның «Салават Юлаев»ын 3:2 исәбенә җиңде, ә «Металлург»ка 1:2 исәбе белән оттырды. Бер атна элек Казан командасы Магнитогорск хоккейчыларына 1:3 исәбенә җиңелгән иде.
Беренче периодның бишенче минутында «Ак Барс» сакчысы Стивен Кэмпфер исәпне ачты (0:1).
Икенче период. Икенче минутта, «Ак Барс» азчылыкта уйнаганда, «Металлург» уенчысы Джош Карри исәпне тигезләштерде (1:1).
Өченче период. Беренче минутта Андрей Чибисов «Металлург»ны бер алкага алга чыгарды (2:1). Һөҗүмче Андрей Чибисов 2015-2017 елларда «Ак Барс» өчен уйнаган иде.
Командалар составы:
«Металлург»
- Кошечкин (Заһидулин);
- Чибисов — Карри — Кошелев, Яковлев — Земчёнок;
- Голдобин — Зернов — Карпов, Дронов — Хультстрём;
- Лайпсик — Майе — Никонцев, Пашнин — Минулин;
- Швырёв — Неколенко — Акользин (Юров), Николаев.
«Ак Барс»
- Бобков (Билалов);
- Кагарлицкий — Галимов — Коваленко, Кэмпфер — Хенкель;
- Воронков — Сафонов — Зарипов, Юдин — Журавлёв;
- Панюков — Уил — Петров, Лямкин — Рукавишников;
- Лукоянов — Бурмистров — Глухов (Квартальнов), Янчевский.
«Ак Барс» киләсе уенында Хабаровск шәһәренең «Амур» командасына каршы көрәшәчәк. Матч Казанда «Татнефть Арена» боз сараенда 17 октябрь 17:30 сәгатьтә башлана.