«Ак Барс» Мәскәүдән җиңү белән кайта: Радулов беренче алкасын кертте
«Ак Барс» хоккейчылары «ЦСКА» капкасына биш алка кертте.
Бүген Казанның «Ак Барс» хоккей командасы узган сезонның чемпионы, Мәскәүнең «ЦСКА» командасын җиңде. Мәскәүдә үткән матч 1:5 исәбенә тәмамланды.
Беренче периодның уналтынчы минутында «ЦСКА» һөҗүмчесе Виталий Абрамов исәпне ачты (1:0). Унтугызынчы минутта «Ак Барс» өчен 100нче уенын үткәрүче Илья Сафонов исәпне тигезләштерде (1:1).
Икенче период. Өченче минутта «Ак Барс» һөҗүмчесе Кирилл Панюков, гол кертеп, команданы алга чыгарды (1:2).
Өченче период. Тугызынчы минутта Александр Радулов Континенталь хоккей лигасында «Ак Барс» өчен беренче алкасын кертте (1:3). Период ахырында «ЦСКА» капкачысын алтынчы мәйдан уенчысына алмаштырды, һәм «Ак Барс» һөҗүмчесе Даниил Тарасов алканы буш капкага кертте (1:4). Уен тәмамланырга берничә секунд калганда, Никита Дыняк «Ак Барс» өчен тагын бер гол кертте (1:5).
Командалар составы:
«ЦСКА»
- Шарыченков (Рейдеборн);
- Карнаухов – Светлаков – Соркин, Нестеров – Диц;
- Слепышев – Григоренко – Плотников, Классон – Провольнев;
- Полтапов – Каменев – Абрамов, Дыбленко – Сергеев;
- Юртайкин – Панкратов – Гуськов (Мингачев), Грудинин.
«Ак Барс»
- Билалов (Мифтахов);
- Кагарлицкий – Шипачёв – Радулов, Хафизуллин – Войнов;
- Галиев – Семёнов – Тарасов, Юдин – Хенкель;
- Дыняк – Сафонов – Воронков, Лямкин – Адамчук;
- Панюков – Бурмистров – Галимов, Евсеев.
«Ак Барс»ның киләсе уены Казанда «Татнефть Арена» боз сараенда узачак. «Ак Барс» 8 сентябрь көнне Владивостокның «Адмирал» командасын кабул итәчәк. Уен 19:30 сәгатьтә башлана.