"Ак Барс" командасы составында бүгенге матч алдыннан үзгәрешләр бар
"Авангард"ка каршы уенда Александр Свитов катнашмый.
(Казан, 19 март, "Татар-информ"). Бүген "Ак Барс" хоккейчылары Гагарин кубогының Көнчыгыш конференция 1/2 финал раундында "Авангард" командасы белән очраша. Казанның "Татнефть Арена" боз сараендагы матч 17:00 сәгатьтә башлана.
"Ак Барс"ның тренерлар штабы составка берникадәр үзгәрешләр кертергә булган. Бу хакта иртәнге күнегүләр вакытында ук билгеле булды. Әйтик, Денис Голубев Иржи Секач һәм Джастин Азеведо белән бер өчлектә шөгыльләнде. Ә алар белән уйнаган Владимир Ткачев Дмитрий Архипов һәм Андрей Чибисов белән уйнарга җыена. Соңгысының плей-оффта чыгыш ясаганы юк иде әле.
Ә бүгенге матчта Александр Свитовны Денис Голубев алмаштыра. Шулай ук Василий Токранов та уйнамый.