«Ак Барс» командасы, бер гол да кертмичә, Новосибирск хоккейчыларына җиңелде
«Ак Барс» киләсе уенын Швейцариянең Давос шәһәрендә үткәрәчәк.
(Казан, 21 декабрь, «Татар-информ», Гөлия Хәсбиуллина). Бүген «Ак Барс» хоккейчылары Казанның Спорт сараенда Новосибирск шәһәренең «Сибирь» командасын кабул итте һәм әлеге уенда җиңелде. «Ак Барс» — «Сибирь» уены исәбе — 0:3.
Бу матчта бозга «Ак Барс» составында ике яңа уенчы чыкты: һөҗүмче Владимир Галузин һәм сакчы Кирилл Адамчук.
Беренче периодта голлар булмады, бары тик сугышулар гына. Сугышкан өчен «Ак Барс»тан Джастин Азеведога 5+2 минут штраф бирелде, «Сибирь»дан Александр Шаров 5 минутлык штраф белән чикләнде.
Икенче период. Унбишенче минутта, «Сибирь» күпчелектә уйнаганда, Данил Романцев «Ак Барс» капкасына гол кертте, исәп ачылды (0:1).
Өченче период. Икенче минутта алка «Сибирь» капкасына керде, ләкин ул хөкемдарның сызгыруыннан соң булды, шуңа гол саналмады. Унбишенче минутта «Сибирь» һөҗүмчесе Юусо Пуустинен алка кертте (0:2). Уенның соңгы минутында, «Ак Барс» капкачысын алтынчы уенчыга алмаштырган вакытта, Алексей Яковлев Казан командасының буш капкасына өченче голны кертте (0:3).
Командалар составы:
«Ак Барс»:
Билалов (Рейдеборн);
Азеведо — Кормье — Галиев, Лямкин — Яруллин;
Фрэттин — Тихонов — Зарипов, Юдин — Рукавишников;
Дыняк — А. Галимов — Кара, Фазылҗанов — Хенкель;
Ли — Галузин — Э. Галимов (Воеводин), Адамчук.
«Сибирь»:
Красиков (Сятери);
Пуустинен — Руохомаа − Шаров, Ермаков — Пиганович;
Миловзоров — Комаров — Михайлов, Ермаков − Демидов;
Чесалин — Торченюк — Яковлев, Морозов — Хабаров;
Первушин — Романцев — Коротков, Ефремов — Тимашов.
«Ак Барс» киләсе уенын Швейцариянең Давос шәһәрендә үткәрәчәк. Давос бозында «Ак Барс» Уфаның «Салават Юлаев» командасы белән очрашачак. Матч 23 декабрь көнне 21:30 сәгатьтә башлана.