«Ак Барс» җитди көндәш белән уен алдыннан «уяныр өчен» 10 минутка бозга чыкты
Казан хоккейчысы Альберт Яруллин ЦСКАга каршы уеннан нәрсә көтүен сөйләде.
(Казан, 23 гыйнвар, «Татар-информ», Фәрит Салихов). ЦСКА белән уен алдыннан кабат командага әйләнеп кайткан «Ак Барс» хоккейчысы Альберт Яруллин бүген көндезге күнегүләрнең 10 минутка гына сузылуына үз аңлатмасын бирде.
«Без кичә дә шудык – шөгыльләндек, бүген дә «уяныр өчен» бераз шуып алдык. Хәзер уенга әзерләнәчәкбез», – диде Альберт Яруллин.
Хоккейчы сүзләренчә, ул үзен яхшы хис итә.
«Шөгыльләндем, уеннарга әзерләндем, үземне формада тотарга тырыштым, – диде ул журналистларга. – Соңгы уеннардагы җиңелүләрме? Барыбыз да аңлап кабул итте. ЦСКА белән уенга аеруча җитди әзерләнәбез».
Исегезгә төшерәбез, «Ак Барс» – ЦСКА уены бүген «Татнефть Арена» боз сараенда 19.30 сәгатьтә башлана.