Спорт 17 август 2017 08:14

"Ак Барс" хоккейчылары Ригададагы турнирда бронза медаль өчен көч сынаша

Казан хоккейчылары турнирның соңгы өч елдагы җиңүчесе иде.

Скопировать ссылку

(Казан, 17 август, "Татар-информ"). Казанның "Ак Барс" хоккейчылары Ригада уза торган Латвия тимер юллары кубогы өчен турнирның төркем этабында уңышсыз чыгыш ясады – 3 матчның берсендә генә җиңү яулады һәм өченче урында гына урнашты.

Турнир кагыйдәләре буенча төркем этабын беренче-икенче урында төгәлләгән командалар – финалда, калган икесе "бронза" өчен матчта очраша. Шулай итеп, бүген хәлиткеч уенда "Динамо" (Рига) белән "Локомотив" командалары көч сынашачак. Ә Казан хоккейчылары өченче урын өчен Минскиның "Динамо" командасы белән уйный.

Белешмә өчен: яңа сезон алдыннан Латвия тимер юллары кубогы турниры 2009 елдан бирле уздырыла. "Ак Барс" турнирның соңгы өч – 2014, 2015 һәм 2016 еллардагы җиңүчесе иде. Алардан тыш Кубокка икешәр тапкыр "Динамо" (Рига) белән "Локомотив" һәм бер мәртәбә СКА хоккейчылары ия булганы бар.

"Ак Барс" – "Динамо" (Минск) матчы бүген 15.30 сәгатьтә башлана.

#Ак Барс #хоккей

Сәхифәләр

"Ак Барс" хоккейчылары Ригададагы турнирда бронза медаль өчен көч сынаша