"Ак Барс" хоккейчылары Казанда "Авангард" командасы белән очраша
Казан командасы серияне үзендәге ике уен белән төгәлләргә дә мөмкин.
(Казан, 13 март, "Татар-информ", Фәрит Салихов). Бүген Континенталь хоккей лигасы Көнчыгыш конференция ярымфиналы серияләрендә өченче уеннар уза. "Ак Барс" хоккейчылары "Татнефть-Арена" боз сараенда Омскиның "Авангард" командасын кабул итә. Матч 19:00 сәгатьтә башлана.
13 март – "Ак Барс" хоккей командасы баш тренеры Зиннәтулла Билалетдиновның туган көне. Аңа бүген 62 яшь тулды. Шунысы кызык: Зиннәтулла Билалетдиновның туган көнендә «Ак Барс» хоккейчылары «Авангард»ка ике тапкыр плей-оффта оттырган инде. Шуның беренчесе 2009 елда Омскида булган – 2:4. Соңгысы моннан ике ел элек Казанда булды (3:4 ОТ). Дөрес, ике очракта да "Ак БАрс" хоккейчылары туган көн бүләген соңрак ясады – беренчесендә Гагарин кубогын отса, икенчесендә сериядә башкача оттырмыйча, Гагарин кубогының финалына кадәр барып җитте.
13 март. Хоккей. Гагарин кубогы. Көнчыгыш конференция. 1/2 финал раунды. 3 нче матч.
"Барыс" (Астана) – "Металлург" (Магнитогорск)
Сериядә исәп: 0 - 2 (0:4, 4:5).
"Ак Барс" (Казан) – "Авангард" (Омск)
Сериядә исәп: 2 - 0 (2:1, 2:0).