«Ак Барс» хоккейчылары Казахстанда җиңү яулады
«Ак Барс» Нур-Солтанның «Барыс» командасыннан ике алкага өстен чыкты.
(Казан, 12 гыйнвар, «Татар-информ», Гөлия Хәсбиуллина). Бүген Казанның «Ак Барс» хоккейчылары Казахстанның Нур-Солтан шәһәрендә «Барыс» командасына каршы уенда җиңде. «Барыс» — «Ак Барс» уены исәбе – 2:4.
Беренче период. Ундүртенче минутта, «Ак Барс» күпчелектә уйнаганда, Кирилл Петров исәпне ачты (0:1). Уналтынчы минутта «Барыс» хоккейчысы Кирилл Панюков гол кертте (1:1).
Икенче период. Икенче минутта, «Барыс» күпчелектә уйнаган вакытта, Кирилл Панюков Казан командасы капкасына икенче алкасын кертте (2:1). Бер минут үтүгә, «Ак Барс» күпчелегендә Найджел Доус исәпне тигезләштерде (2:2). Дүртенче минутта Станислав Галиев «Ак Барс»ны бер алкага алга чыгара алды (2:3).
Өченче периодның беренче минутында ук «Ак Барс» һөҗүмчесе Патрис Кормье гол кертте (2:4).
Командалар составы:
«Барыс»
- Карлссон (Ортио);
- Панюков — Вароне — Фрэттин, Линтуниеми — Диц;
- Виделль — Волк — Лилья, Хетерингтон — Блэкер;
- Старченко — Шестаков — Михайлис, Орехов — Маклюков;
- Акользин — Сагадеев — Асетов (Мусоров), Гайтамиров.
«Ак Барс»
- Билалов (Әхтәмов);
- Доус — Да Коста — Воронков, Викстранд — Мёрфи;
- Галиев — Кормье — Зарипов, Юдин — Журавлёв;
- Песонен — Фисенко — Петров, Хенкель — Педан;
- Лукоянов — Глухов — Дыняк (Сафонов), Рукавишников.
Киләсе уенны «Ак Барс» Казанда «Татнефть-Арена» боз сараенда үткәрәчәк. «Ак Барс» — «Авангард» матчы 15 гыйнвар көнне 19:00 сәгатьтә башлана.
«Ак Барс» хоккей клубының официаль сайтында бирелгән мәгълүматлар буенча, «Ак Барс» һәм «Барыс» командалары арасындагы уеннар ак барсларның табигатьтә кимү проблемасына багышланган. Ике команданың символы — барс, һәм ике команда да әлеге төр җанварны саклап калу өчен төрле чараларда ярдәм күрсәтә, финанс яктан булыша. Казанның хоккей командасы Алтай Республикасының «Сайлюгемский» милли паркының ак барсларны коткару программасында катнаша.