"Ак Барс" хоккейчылары ил чемпионатында 91 нче тапкыр "Динамо" командасы белән очраша
Ике ай элек Мәскәү хоккейчылары җиңүгә ирешкән иде.
(Казан, 11 декабрь, “Татар-информ”, Фәрит Салихов). Казанның “Ак Барс” хоккей командасы Континенталь хоккей лигасы даими чемпионатында бүген үз бозында Мәскәүнең “Динамо” командасы белән очраша.
Ил чемпионатында көндәшләр үзара барлыгы 90 тапкыр очрашкан: 37 матчта – “Ак Барс”, 46 уен “Динамо”ның җиңүе белән төгәлләнгән. Моннан тыш 7 уен тигез исәпкә төгәлләнгән.
Бу сезонда “Ак Барс” Мәскәүдә “Динамо” белән очрашты инде – 11 октябрьдәге уен “Динамо”ның буллит сериясендәге җиңүе белән төгәлләнде (3:2).
Хәзергә 42 уенда 65 очко туплаган “Динамо” КХЛның Көнбатыш конференциясендә – алтынчы, 40 уенда 73 очко җыйган “Ак Барс” Көнчыгыш конференциядә беренче урында бара.
“Татнефть Арена” боз сараендагы бүгенге матч 19.30 сәгатьтә башлана.