"Ак Барс" хоккейчылары Гагарин кубогы өчен көрәштә "Авангард" командасын отты
Дүрт җиңүгә кадәр дәвам итәчәк сериядә бишенче матч 17 мартта Омскида уза.
(Казан, 15 март, "Татар-информ", Фәрит Салихов). Континенталь хоккей лигасы Көнчыгыш конференция ярымфинал сериясенең дүртенче матчында "Ак Барс" хоккейчылары Казанда "Авангард" командасын отты – 2:1. Дүрт матчтан соң сериядә исәп "Ак Барс" файдасына 3:1 булды.
Казан командасы алдагы уендагы кебек беренче минутларда ук өстенлекне үз кулына алды. Шуның нәтиҗәсе буларак исәп беренче период азагына Казан командасы файдасына 2:0 булды. Голларны команда капитаны Александр Свитов һәм Андрей Попов кертте.
Икенче периодта "Ак Барс"ның исәпне тагын да арттыру мөмкинлекләре булса да, уенның әлеге өлешендә голлар күрмәдек. Ә өченче период башлану белән "Авангард" Николай Лемтюгов тырышлыгы белән исәпне кыскартып, үз тамашачыларында җиңүгә өмет уята алды. Азактан "Ак Барс" сакчысы Альберт Яруллинның штраф эскәмиясенә озатылуы, ә "Авангард" командасының капкачысын алтынчы уенчыга алыштыруы да нәтиҗә бирмәде. Исәп үзгәрешсез калды – 2:1.
Шулай итеп, дүрт җиңүгә кадәр дәвам итәчәк серия Омскига күчә. 17 марттагы уен соңгысы да булырга мөмкин.
Ә ул арада Магнитогорскиның "Металлург" командасы "Барыс"ны дүрт уен рәттән отып, Конференция финалына чыкты да инде.
Хоккей. Гагарин кубогы. Көнчыгыш конференция 1/2 финал. 4нче матч. "Ак Барс" (Казан) – "Авангард" (Омск) – 2:1 (2:0, 0:0, 0:1).
1:0 Свитов (Токранов, 09:37)
2:0 Попов (Захарчук, Мусин, 17:36)
2:1 Лемтюгов (Соботка, 41:25).
Капкачылар: Гарипов – Фурх.
Сериядә исәп: 3 - 1 (2:1 ОТ, 2:0, 3:4 ОТ, 2:1).