«Ак Барс» хоккейчылары өченче тапкыр «Металлург» командасына җиңелде
«Металлург» — «Ак Барс» уены исәбе — 3:1.
(Казан, 28 октябрь, «Татар-информ», Гөлия Хәсбиуллина). Бүген Казанның «Ак Барс» хоккейчылары Магнитогорск шәһәренең «Металлург» командасына җиңелде.
Матч исәбе — 3:1. Уен Магнитогорск бозында узды. Казан командасы «Металлург»ка әлеге сезонда өченче тапкыр оттырды.
Һөҗүмче Михаил Глухов бүген «Ак Барс» өчен 400нче һәм Континенталь хоккей лигасы өчен 600нче уенын үткәрде.
Беренче периодта голлар булмады.
Икенче периодның ундүртенче минутында «Металлург» һөҗүмчесе Брендэн Лайпсик исәпне ачты (1:0). Унҗиденче минутта Джош Карри «Металлург» өчен икенче алканы кертте (2:0).
Өченче периодның икенче минутында «Ак Барс» һөҗүмчесе Никита Дыняк командасының артка калышуын киметте (2:1). Период ахырында «Ак Барс», капкасын буш калдырып, алтынчы мәйдан уенчысын чыгарды, һәм шул вакытта «Металлург» уенчысы Джош Карри алканы буш капкага кертте (3:1).
Командалар составы:
«Металлург»
- Олкинуора (Кошечкин);
- Чибисов — Карри — Кошелев, Яковлев — Земчёнок;
- Голдобин — Зернов — Карпов, Пашнин — Минулин;
- Лайпсик — Майе — Коростелев, Маклюков — Хультстрём;
- Руденков — Неколенко — Акользин, Николаев.
«Ак Барс»
- Билалов (Бобков);
- Кагарлицкий — Галимов — Тарасов, Журавлёв — Рукавишников;
- Уил — Воронков — Петров, Лямкин — Адамчук;
- Панюков — Сафонов — Дыняк, Лучевников — Янчевский;
- Лукоянов — Бурмистров — Глухов (Кателевский), Хенкель.
«Ак Барс»ның киләсе уены Чиләбе шәһәрендә булачак. «Трактор» — «Ак Барс» матчы 30 октябрь 15:00 сәгатьтә башлана.