"Ак Барс" хоккейчылары бүген "Авангард" командасы белән очраша
Казан хоккейчылары, уңышка ирешкән очракта, сериядә исәп аермасын тагын да арттыра ала.
(Казан, 15 март, "Татар-информ", Фәрит Салихов). Бүген Континенталь хоккей лигасы Көнчыгыш конференция ярымфиналы серияләрендә дүртенче уеннар уза. "Ак Барс" хоккейчылары "Татнефть-Арена" боз сараенда Омскиның "Авангард" командасын кабул итә. Матч 19:00 сәгатьтә башлана.
Бүгенге очрашу сериядә хәлиткеч матчларның берсе булачак. Уңышка ирешкән очракта, "Ак Барс" хоккейчыларына тулаем уңыш өчен бер генә җиңү кирәк калачак. Ә "Авангард"ның уңышы сериядә исәпнең тигезләнүенә китерәчәк.
Исегезгә төшерәбез, плей-оффта серия 4 җиңүгә кадәр дәвам итә.
15 март. Хоккей. Гагарин кубогы. Көнчыгыш конференция. 1/2 финал раунды. 4нче матч.
"Барыс" (Астана) – "Металлург" (Магнитогорск)
Сериядә исәп: 0 - 3 (0:4, 4:5, 3:5).
"Ак Барс" (Казан) – "Авангард" (Омск)
Сериядә исәп: 2 - 1 (2:1, 2:0, 3:4 ОТ).