Спорт 23 декабрь 2009 12:03

“Ак Барс” бүген Чиләбе “Трактор”ын кабул итә

Тәнәфестән соң Континенталь хоккей лигасында уеннар янәдән башланып китте

Скопировать ссылку

(Казан, 23 декабрь, “Татар-информ”). Евротурның Мәскәү этабы белән бәйле тәнәфестән соң, Континенталь хоккей лигасында уеннар янәдән башланып китте. “Ак Барс” хоккейчылары паузадан соң беренче очрашуны бүген үз бозында уздыра. Казанлыларның көндәше –Чиләбе “Трактор”ы. Уен Мәскәү вакыты белән кичке сәгать 7 дә башлана. “Ак Барс”-“Трактор” матчының хөкемдарлары -Сергей Кулаков (Тверь), Евгений Гамалей һәм Александр Захаренков(Мәскәү).

Бу сезонда көндәшләр инде ике тапкыр очрашырга өлгерде. 20 октябрьдә Казанда узган очрашуда өстәмә вакытта 3:2 исәбе белән “барс”лар өстен чыкты. Ә 10 көн элек кенә Чиләбе бозында узган очрашуда җиңүчене ачыклау өчен буллитлар сериясе кирәк булды. Анда 1:0 исәбе белән отып, “Тарктор” реванш алган иде.

Казан клубының рәсми сайты мәгълүматларына караганда, “Ак Барс” белән “Трактор” ил чемпионатында барлыгы 56 тапкыр очрашкан. Статистика казанлылар файдасына түгел. Безнең хоккейчылар 23 тапкыр җиңгән, 26 очрашуда җиңелгән. 7 уен уртак исәпкә тәмамланган.

Сәхифәләр

“Ак Барс” бүген Чиләбе “Трактор”ын кабул итә