Айдар Сәлимгәрәев Россия Президенты Рәхмәте белән бүләкләнде
«Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев РФ Президенты Рәхмәте белән бүләкләнде.
Бу бүләкне аңа Казан Кремлендә Татарстан Президенты Рөстәм Миңнеханов тапшырды.
«Беренче чиратта, бу бүләк миңа гына түгел, безнең бөтен коллективка. Бу алдагы казанышларга, инициативалы эшкә, проектларга үзенә күрә бер аванас кебек тә. Барлык хезмәттәшләремә рәхмәт билгесе, тырышып, күңел белән эшләргә теләк тудыра торган бүләк», - диде Айдар Сәлимгәрәев журналистларга.
Шундый ук дәүләт бүләге ТР Президенты Аппараты җитәкчесенең беренче урынбасары – ТР Президентының Территорияләр белән эшләү идарәсе башлыгы Илнур Гариповка, «Патриот» Республика спорт-патриотик, яшьләрнең чакырылышка кадәр әзерлеге үзәге директоры Дмитрий Литвиновка тапшырылды.