Айдар Метшин Кызыл Чишмә бистәсендә тавыш бирде

Дәүләт Думасына Татарстаннан сайланган депутат, «Бердәм Россия» фракциясе әгъзасы Айдар Метшин Шәңгәлче авыл җирлегендә оештырылган сайлау участокларында булды. Бу хакта «Бердәм Россия»нең Татарстандагы төбәк бүлеге матбугат хезмәте хәбәр итә.

Ул республиканың яңа федераль закон белән беркетелгән ике дәрәҗәле муниципаль идарә системасын саклап кала алуын билгеләп үтте һәм авыл халкының тавыш бирүдә актив катнашуын искәртте. Аның сүзләренчә, мондый гражданлык активлыгы Татарстан һәм Россия халкының күпчелегенә хас.

Метшин үзенең сайлау хокукын Түбән Кама районының Кызыл Чишмә бистәсендә гамәлгә ашырды, ул һәрвакыт шунда тавыш бирә. Ул участокның партиянең халык программасы кысаларында төзелгән заманча авыл мәктәбендә урнашуына игътибар юнәлтте.

Парламентарий сүзләренчә, «Бердәм Россия» партиясе, эш нәтиҗәләренә таянып, сайлауга ышанычлы рәвештә бара. Ул билгеләп үткәнчә, партиянең халык программасы мәктәпләр, хастаханәләр, поликлиникалар төзергә, шәһәрләрне һәм авылларны гражданнарның наказлары нигезендә төзекләндерергә мөмкинлек бирә.

Ул Дәүләт Думасында «Бердәм Россия» фракциясе, Татарстан Дәүләт Советы һәм Түбән Кама районы депутатлары арасындагы килешүне мисал итеп китерде, әлеге килешү Түбән Камада яңа балалар һәм өлкәннәр поликлиникалары төзелешенә старт бирде.

Метшин сүзләренчә, мондый проектлар хакимият һәм җәмгыять арасындагы диалогның нәтиҗәлелеген күрсәтә, ә халыкның партиягә ышанычы аларның актив мөрәҗәгатьләре белән раслана.

Бүген, 14 сентябрьдә, Татарстанда Бердәм тавыш бирү көне уза. Республика халкы Татарстан Рәисен сайлый. Шулай ук 18нче Мәләкәс округы буенча Дәүләт Советы депутаты һәм 7,5 меңнән артык муниципаль депутат сайлана.

Татарстан Рәисен сайлауда дүрт кандидат катнаша (алфавит тәртибендә): Рөстәм Миңнеханов («Бердәм Россия»), Хафиз Миргалимов (КПРФ), Виталий Смирнов («Социаль гаделлек өчен Россия пенсионерлар партиясе») һәм Руслан Йосыпов (ЛДПР).

Муниципаль сайлауларда катнашучыларның рекордлы саны теркәлгән – 11,4 меңнән артык кандидат. Алар арасында төп партияләр вәкилләре һәм үз-үзен тәкъдим итүче буларак катнашучы 2,6 меңнән артык кеше бар.

Татарстанда тавыш бирү өчен 2752 участок ачылды. Участоклар 7:00 сәгатьтән 20:00 сәгатькә кадәр эшләячәк.

«ТНВ-Татарстан» һәм «ТНВ-Планета» телеканалларында 14 сәгатьлек «Мин яратам сине, Татарстан!» телемарафоны уза. Ул 22:00 сәгатькә тәмамланачак.

Эфирда сайлау участокларыннан репортажлар күрсәтелә. Студиядә экспертлар, сәясәтчеләр һәм артистлар чыгыш ясый. Шулай ук «Татарстан Алга» фотоконкурсына йомгак ясала – эфирда 2 Sollers ST8 автомобиле һәм 11 iPhone 16 смартфоны уйнатыла.