Әгъзам Шакиров: Яшьләр авылда үзләренә эш булдырырга тырыша

Чувашия Республикасы милли-мәдәни берләшмәсе рәисе Әгъзам Шакиров үз төбәкләрендәге татарлар, аларның яшәеше, эш-көнкүреше, якташларының үрнәк булырлык гамәлләре белән таныштырды.

«Тукай авылында туып-үстем, туган ягыма тугры булып яшим, авылыбызда яшьләр төпләнеп кала, читкә китми. 1991 елда авылда 298 хуҗалыкта 1645 кеше яшәгән. Хәзер исә 500 артык хуҗалыкта 2000 артык кеше яши. Мәктәптә 348 бала белем ала. Туучылар саны үлүчеләргә караганда ике-өч мәртәбә күбрәк. «Ил буенча авыл халкы шәһәргә күчкәндә, сезнең як авыллары киресенчә үсәләр», – диючеләр бар», – диде ул «Корстон» сәүдә-күңел ачу комплексында Бөтендөнья татар конгрессы XIII Бөтенроссия татар авыллары эшмәкәрләре җыенының пленар утырышында чыгышында.

Аның фикеренчә, эш – тәрбиядә. «Бездә халык туган йортын, әти-әнисен ташлап чыгып китми, өч-дүрт буын бергә яши. Әби-бабайлар оныкларына гореф-гадәтләребезне өйрәтә. Яшьләр олыларга хөрмәт күрсәтә, ә балалар шуны күреп үсә. Буыннар бәйләнешләре өзелми. Яшьләр авылда үзләренә эш булдырырга тырыша. Күпчелек халык сәүдә итә, мал асырый, төзелештә эшли, үз көнен үзе күрә. Туксанынчы елларда эшмәкәрлеккә ирек бирелгәч безнең халык сәүдә эшенә кереп китте. Шуннан соң, Чувашия Республикасы авыллары күзгә күренерлек үсеш алды», – диде ул

Аның сүзләренчә, Чувашиядә татар авылларының тагын бер үзенчелекле ягы – эшмәкәрләр үз хуҗалыгын күтәрү белән генә чикләнми, туган авылларын да кайгырта.

«Мин дә 2000 елда авылыбызда үз хисабыма юл салдырдым. Аллаһка шөкер, аның белән малым кимемәде,киресенчә, Аллаһ уйламаган җирдән юлны ачты. Шулай итеп мин дин юлына бастым», - диде ул.

Ул Тукай авылы эшмәкәрләренең эшләре турында таныштырды. 2001 елны авылда газ кертәләр, мәчет каршында дин сабаклары укыта башлыйлар.2007 елда, киңәшләшеп, мәхәллә системасын торгызуга алыналар. Һәр төр эшне киңәшеп, уртага салып сөйләшеп башкаралар», - диде Әгъзам Шакиров.

«Авыл тормышына битараф булмаган актив егетләр канатланып авылда юллар, чишмәләр төзекләндерүдә һәм башка иҗтимагый эштә ярдәм итә башлады. Мәчет янында ел әйләнәсенә эшли торган мәдрәсә ачтык. Мәхәлләнең балалар бакчасын булдырдык. Авылның үз газетасы чыга башлады, үз сайтыбыз эшли. Безнең приоритет – балаларыбызга дини һәм әхлакый тәрбия бирү. Күмәк эшләрнең нәтиҗәсе дә бар. Тукай авылында бер кибеттә дә исерткеч эчемлекләр сатылмый, мәчет сафлары яшьләр белән тулы, хәләл туйлар даими үткәрелә. «Авылыбызда бәрәкәт артты», – диде татар эшмәкәре.