Рәсми Татарстан 22 декабрь 2004 15:46

Агымдагы һәм киләсе ел бюджетына үзгәрешләр кертеләчәк

Скопировать ссылку

(Казан, 22 декабрь, «Татар-информ», Альбина Фәхрисламова). Бүген өченче чакырылыштагы ТР Дәүләт Советының тугызынчы утырышында депутатлар 2004 һәм 2005 еллар бюджетына үзгәрешләр кертүче закон проектларын беренче укылышта кабул итте.

Депутатларда агымдагы ел бюджеты турындагы законга үзгәрешләр кертү генә сораулар тудырган. Әлеге законга төзәтмәләр дүртенче тапкыр кертелә. Искә төшереп үтәбез, ел ахырына кадәр республика бюджетына керергә тиешле өстәмә керемнәрнең гомум суммасы 8,7 миллиард сум тәшкил итә. Аларның 4,3 миллиард сумы - республика акчалары, 3,3 миллиард сумы максат фондлары һәм федераль максатчан программалар буенча федераль бюджеттан килгән акча. Өстәмә керемнәрне бюджет дефицитын финанслауга, авыл хуҗалыгына ярдәм итүгә, шулай ук Казан объектлары төзелеше һәм реконструкциясенә 1,5 миллиард сум күләмендә акча бүлеп бирүне кертеп, мәдәният, мәгариф, сәламәтлек саклау, социаль ярдәм һәм транспорт оешмаларына ярдәм итүгә капитал салуга юнәлдерү ниятләнә.

Депутатлар Хөкүмәтнең киләсе ел бюджетының керем өлешен 2,2 миллиард сумга арттыру турында үзгәрешләр кертү турындагы тәкъдименә теләктәшлек белдерде. Үзгәрешләр федераль бюджеттан планлаштырылган керемнәрне ачыклау белән бәйле. "Казан шәһәренең инвестицион җәлеп итүчәнлеген күтәрү" проектын гамәлгә кую өчен, грант турындагы килешүләр буенча алынган 1,5 миллиард сум күләмендә акча башкала бюджетына юнәлдереләчәк.

Сәхифәләр

Агымдагы һәм киләсе ел бюджетына үзгәрешләр кертеләчәк