Марат Әхмәтов авыл хезмәтчәннәрен Яңа ел белән котлады

2007 ел нәтиҗәләре куандыра. Республика кырларның уңдырышлылыгы һәм фермаларның продукция бирүчәнлеге буенча тотрыклы югары дәрәҗәгә чыкты
(Казан, 29 декабрь, “Татар-информ”). ТР Премьер-министры урынбасары – авыл хуҗалыгы һәм азык-төлек министры Марат Әхмәтов республика авыл хуҗалыгы һәм эшкәртү сәнәгатендә эшләүчеләрне Яңа ел белән котлады, дип хәбәр итә аграр ведомствоның матбугат хезмәте.
Котлауда, аерым алганда, узып баручы елның Татарстан Республикасы авыл хезмәтчәннәре өчен нәтиҗәле хезмәт, үсемлекчелек һәм терлекчелек продукциясе җитештерүдә яңа казанышлар елы булуы хакында әйтелә. 2007 ел нәтиҗәләре куандыра. Республика кырларның уңдырышлылыгы һәм фермаларның продукция бирүчәнлеге буенча тотрыклы югары дәрәҗәгә чыкты.
Үкән елгыдан аермалы буларак, авыл хуҗалыгы продукциясе җитештерү темплары ике тапкыр артты. “2007 елда 1 миллион 730 мең тонна сөт, 355 мең тонна ит җитештерелде, бер сыердан савып алынган сөтнең уртача күләме 4 мең килограмм чиген узып китте”, - дип ассызыклады М.Әхмәтов.
Тәбрикләү сүзендә шулай ук авылда бүгенге көндә хуҗалык итүнең яңа формалары: крестьян (фермер) хуҗалыклары, шәхси хуҗалыклар, кулланучылар кооперативлары динамик рәвештә үсеш кичерүенә басым ясала. Авылдагы яшь белгечләрнеи торак белән тәэмин итү программасы уңышлы гамәлгә ашырыла. Быел 3 меңнән артык белгеч һәм яшь гаиләләр заманча торак төзүгә субсидияләр алды.
“2008 елга аяк басканда без авыл кешеләренең һәм республикабызда яшәүчеләрнең тормышын яхшырту өчен алга таба авыл хуҗалыгы производствосын үстерү һәм аның нәтиҗәлелеген күтәрүгә өмет баглыйбыз. Киләсе елда тагын да югарырак уңышларга ирешербез дип уйлыйм”, - диде аграр ведомство башлыгы. М.Әхмәтов авыл хуҗалыгы хезмәтчәннәренә яңа елда ныклы сәламәтлек, иминлек, муллык, теләкләренең тормышка ашуын теләде. “2008 ел туган Татарстаныбызда яшәүче һәркем өчен бәхетле һәм уңышлы булсын!”, - диелә М.Әхмәтовның котлавында.