Татарстанда авыл хуҗалыгы техникасын кышка сакларга кую буенча конкурс тәмамланды

(Казан, 28 октябрь, «Татар-информ», Ирина Игнатьева). Татарстанда авыл хуҗалыгы техникасын кышка сакларга кую һәм машина-трактор паркларын ремонт сезонына әзерләү буенча конкурс тәмамланды.
1 урынны алган агроснәгать комплексы предприятиесенә 100 мең сумлык запас частьлар яки технологик җиһазлар тапшырылачак, ә икенче урынга – 50 мең сумлык. Бу хакта “Татар-информ” агентлыгы хәбәрчесенә ТР Авыл хуҗалыгы һәм азык-төлек министрлыгында белдерделәр.
Конкурс нәтиҗәләре буенча һәр районнан 2 предприятие билгеләнгән. Алар кыска вакытта авыл хуҗалыгы техникасын кышка сакларга кую һәм машина-трактор паркларын ремонт сезонына әзерләүгә ирешкән. Шулай итеп, Әтнә районында “Таң” авыл хуҗалыгы җитештерү комплексы беренче урынны алган, икенче урында – “Ташчишмә” АХҖК.
Балтач районында “Якты юл” ҖЧҖ һәм “Яңа тормыш” ҖЧҖ беренчелеккә чыккан. Спас районында С.Юрков белән Л.Гиниятуллин крестьян-фермерлык хуҗалыклары җиңүгә ирешкән.
Якындагы көннәрдә җиңгән предприятие вәкилләре Казанга запас частьлар яки технологик җиһазлар алырга килергә тиеш. Шулай ук ихтыяҗ булган әйберне сайлап алу мөмкинлеге бар.