Тукай районында шикәр чөгендерен соңгы гектарларда чәчәләр

(Тукай, 14 май, "Татар-информ", "Якты юл"). Бүгенге көндә район буенча язгы чәчү 54 процентка башкарылган. 31,2 мең гектар мәйданда язгы бөртекле культуралар чәчелгән, дип яза район газетасы.

Пландагы 3,5 мең гектар мәйданның 3,2 мең гектарында шикәр чөгендере чәчелгән. Бу шикәр чөгендерен чәчү тәмамлануга бара дигән сүз. Сәйдәшев исемендәге хуҗалыкта да чәчү оешкан төстә бара. Бүгенге көндә хуҗалык басуларында борчак, солы, арпа чәчелгән. Шушы көннәрдә бодай чәчүгә керешергә ниятлиләр. Хуҗалык җитәкчесе Марат Сафин хәбәр итүенчә, кырда 23 трактор һәм 6 чәчү комплексы эшли.