Тукай районында язгы чәчү 40 процентка башкарылган

(Тукай, 10 май, "Татар-информ", "Якты юл"). Тукай районы авыл хуҗалыгы һәм азык-төлек идарәсе хәбәр итүенчә, тиешле 45,8 мең гектар җирнең 18,2 мең гектарында чәчү башкарылган, дип яза район газетасы.

12,8 мең гектарда язгы бөртекле культуралар, 2,6 мең гектарда шикәр чөгендере чәчелгән. Алдынгылар рәтендә бүгенге көндә «Кама-Бекон», «Ярыш», «Р-Агро» хуҗалыклары һәм «Кама» агрофирмасы. Бу хуҗалыкларда чәчү ким дигәндә 39 процентка башкарылган.

- Районның барлык хуҗалыклары һәм крестьян-фермер хуҗалыклары чәчү белән мәшгуль. Бу елгы чәчү оешкан төстә бара. Күрсәткечләр буенча артка калабыз дип әйтә алмыйм, - диде район авыл хуҗалыгы һәм азык-төлек идарәсе башлыгы Хәйдәр Сабитов.