Түбән Кама районына Даниядән сыерлар кайтартылды

Алар көненә 30-40 литр сөт бирә, сөтләре аксым, май һәм кальцийга бай булуы белән аерылып тора.

(Казан, 7 октябрь, «Татар-информ»). Түбән Каманың «Орсис-Агро» хуҗалыгына Даниядән джерси токымлы сыерлар кайтартылды. Декабрь аенда бозауларга тиешле 130 баш сыер әлеге вакытта ветеринария таләпләре буенча карантинда. Бу хакта Түбән Кама муниципаль районы рәсми сайтында хәбәр ителә.

«Джерси — чагыштырмача кечкенә токым, бу сыерларның биеклеге — 1,2 метр, авырлыгы 400 кг тирәсе. Алар көненә 30 — 40 литр сөт бирә, сөтләре аксым, май (6 проценттан артык) һәм кальцийга бай булуы белән аерылып тора. Һәрчак яңалыкка омтылучы терлекчеләребезгә уңышлар, куелган максатларының тормышка ашуын телим», — дип яза инстаграмдагы битендә башкарма комитет җитәкчесе урынбасары Альфред Нигъмәтҗанов.