Әгерҗедә бәйрәм алды ярминкәсендә арзанрак бәядән азык-төлек саттылар

Сатуда ит, бал, печән, ашлык, утын һәм башка авыл хуҗалыгы продукцияләре алырга мөмкин иде.

(Әгерҗе, 7 март, «Татар-информ»,«Әгерҗе хәбәрләре», Миләүшә Ягъфәрова). Бүген Әгерҗенең үзәк мәйданында иртәнге сәгатьләрдә үк бәйрәм алды ярминкәсе эшләде. Бу турыда район басмасы хәбәр итә.

Авыл халкы шәһәрне сыйлый. Итне берничә урында саталар. Бәяләре дә «тешләми», тананыкын, мәсәлән, 280 сумнан алырга була. Фермерлар печән, ашлык та тәкъдим итәләр. Утын сатып алырга да мөмкин.

Каз, бройлер түшкәләре, бытбылдык ите дә бар. Казның килограммы 450 сум тора. Балның 1 килосын 400-500 сумга алырга була.

«Халык 7.00 сәгатьтә үк ярминкә буласы урында җыелган иде», — диде район авыл хуҗалыгы идарәсе җитәкчесе Дилүс Гатауллин.